Aksııany «Astana jastary» jastar resýrstyq ortalyǵy uıymdastyrdy. Onyń maqsaty – jalǵyz turatyn qarttarǵa turaqty kómek kórsetý. Volonterler qarııalardyń úıine baryp, úı sharýasyna kómektesedi, aýlalary men podezderin tazalaıdy, keıde áńgimelesip, kóńil surasady.
Aksııa aıasynda «Astana jastary» volonterleri jalǵyz turatyn zeınetker Raıda Mıftahovanyń úıine bardy. Oǵan turaqty túrde kómek kórsetiledi: volonterler aýlasyn qardan tazalap, úıiniń sharýasyna kómektesedi. Shaı ústinde ájeı ótken ómirin, tájirıbesin áńgimelep, estelikterimen bólisti. Volonterlerdiń kóńili men qamqorlyǵy qoldaýdyń mańyzdy bóligi bolyp sanalady.
«Qamqorlyq mekenjaıy» jobasy iske qosylǵan ýaqyttan beri kóptegen muqtaj azamat qamtyldy. «Astana jastary» volonterleriniń eńbegimen 70 jeke aýlada jalǵyz turatyn zeınetkerlerge kómek kórsetildi. Sondaı-aq kásiporyndar men volonterlik uıymdarmen birlese otyryp, 40 qar tazalaý aksııasy ótkizildi. Jappaı sharalardy uıymdastyrýǵa 3 000-nan astam volonter men ártúrli uıymnyń qyzmetkerleri tartyldy.
«Qamqorlyq mekenjaıy» jobasy adamdarǵa – ardagerlerge, qarttarǵa, áleýmettik qoldaýdy qajet etetin azamattarǵa tikeleı kómek kórsetýge baǵyttalǵan. Sonymen qatar, aksııa «Taza Qazaqstan» bastamasymen úılesimdi júzege asady: ol áleýmettik qoldaýǵa, aýmaqty ekologııalyq jáne sanıtarlyq turǵydan jaqsartýǵa, aýlalar men qoǵamdyq keńistikterdi abattandyrýǵa baǵyttalǵan. Osylaısha, ómir sapasy dál qarttar men áleýmettik turǵydan osal azamattar turatyn aýdandarda jaqsarady.
